Fyrir öll sem elska fjöll!
Hægt er að skrá sig í stakar göngur

Útigengið er fyrir fólk sem finnst gaman að vera úti í náttúrunni og vilja nýta hana til líkamsræktar, ásamt því að kynnast nýjum stöðum og bæta við færni sína á fjöllum.

Okkur í Útihreyfingunni finnst þó jafnan einn aðal ávinningurinn af reglulegum fjallgöngum (fyrir utan lögulegan afturenda…) vera andlega næringin og félagsskapurinn. Hægt er að njóta náttúrunnar og ganga í djúpum þönkum eða spjalla við ferðafélagana og kynnast nýju fólki.

Fjallgöngur og útivera styrkja nefnilega ekki bara líkamann, lækka blóðþrýsting og bæta hjartaheilsu heldur næra ekki síður huga og sál, draga úr kvíða, þunglyndi og stressi auk þess sem félagslegi ávinningurinn er ómetanlegur. Sjá m.a. nýlega vísindagrein hér. 

DAGSKRÁIN

Dagskrá Útigengisins er að öllu jöfnu afar fjölbreytt og glímt er við stærri og minni fjöll eftir árstíma og aðstæðum. Auk þess er reynt að blanda saman þekktum og minna þekktum tindum og gönguleiðum.

Í haust verður farið í alls 8 fjallgöngur frá byrjun september og fram í miðjan desember. Haldið er til fjalla á sunnudögum, að meðaltali aðra hvora helgi. Ef veður hamlar för á sunnudegi, getur verið að göngu verði flýtt til laugardags. Að auki getur veður og aðstæður valdið því að breyta þurfi áfangastaðnum.

Hægt er að skrá sig í stakar göngur með því að smella á nafn hvers fjalls hér að neðan. Ganga á Baulu kostar 14.900 kr. Aðrar göngur kosta 8.900 kr.

Dagskrá Útigengisins haustið 2026

• 6. sept. Prestahnúkur
• 13. sept. Skessuhorn
• 4. okt. Bláfjöll – Herdísarvík
• 18. okt. Hrafnabjörg
• 1. nóv. Baula
• 15. nóv. Keilir og Lambafellsklofi
• 29. nóv. Meðalfell
• 13. des. Fjallið Eina og Steinbogahellir

Hópurinn hefur samskipti sín á milli og sameinast í bíla inni á sérstakri Facebook síðu.

Umsjónarmenn Útigengisins eru Brynhildur Ólafsdóttir og Róbert Marshall, ásamt öðru leiðsögufólki Útihreyfingarinnar.