Vikulegar fjallahjólaæfingar
Hefst 23. apríl

Staðreynd: Besta leiðin til að verða góð á fjallahjóli er að hjóla á fjallahjóli. Mikið og oft. Þetta vita allir. En hvað á að æfa og hvernig til að verða enn betri?

Þetta getuskipta námskeið er skipulagt til að gera þig að betri hjólara og leggja góðan grunn að æfingum í fjallahjólreiðum. Bættu tæknina, fáðu meira út úr hverjum pedalahring og hjólaðu hraðar og lengra með þjálfurum Útihreyfingarinnar sem hafa í áraraðir miðlað af reynslu sinni og þekkingu í hjólafræðunum.

Hver er besta leiðin til að klífa langar brekkur, hvernig á að tækla bratta niður í móti, yfirstíga hindranir, bæta jafnvægið og almennt bara vera á hjólinu? Þetta og margt fleira á þessu 6 vikna námskeiði sem er getuskipt og hentar því bæði fyrir þau sem eru að taka sína fyrstu hjólahringi sem og hina sem vilja bæta tæknina og koma sér í gírinn fyrir komandi hjólasumar.

Hópurinn hittist alls sex sinnum, fimm sinnum seinnipartinn á miðvikudögum á æfingu sem tekur 1.5-2 klst. og einu sinni í lengri fjallahjólaferð á sunnudegi.

Dagskrá námskeiðsins

• Mið. 23. apríl. Kl. 18
• Mið. 30. apríl. Kl. 18
• Mið. 7. maí. Kl. 18
• Mið. 14. maí. Kl. 18
• Mið. 21. maí. Kl. 18
• Sun. 25. maí. Kl. 10

Til að taka þátt í námskeiðinu þurfa þátttakendur að eiga eða leigja eftirfarandi hjólatýpu: Fulldempað fjallahjól eða fulldempað rafmagnsfjallahjól. Fjallahjól sem eru einungis með framdempara (svokallað hardtail) ganga líka en þá er betra að hafa möguleikann á því að geta lækkað sætið á hjólinu.

Miðvikudagana 14. og 21. maí verður hópnum skipt upp og þeir sem það vilja geta þá farið dýpra í tæknina, þ.e. læra grunntækni í tæknilegri leiðum / downhill. Athugið þá þarf að auki að eiga extra fjallahjólaöryggisbúnað, að lágmarki hnéhlífar, bakbrynju og hjálm með kjálka.

Helga María Heiðarsdóttir leiðir námskeiðið en henni til halds og trausts eru Kjartan Salómonsson og Róbert Marshall.

Námskeiðið kostar 24 þúsund kr. fyrir þau sem æfa með Útihreyfingunni en 28 þúsund kr. fyrir aðra. Skráðir þátttakendur fá nánari upplýsingar í tölvupósti í aðdraganda námskeiðsins.