Æfingaferðir á utanbrautarskíðum
23. janúar – 17. mars

Eitt aðalmarkmið æfingahópsins er að þátttakendur læri vel á ferðaskíðin og skinnin og alla tækni við beitingu skíðanna. Brekkur upp. Brekkur niður. Hliðarhalli. Mismunandi snjóalög, færi og undirlag. Allt þarf að læra á og æfa sig í að gera.

Í öðru lagi finnst okkur alltaf gaman að ganga á skíðum á nýjum stöðum. Við viljum því nota tækifærið til að kynna hópinn fyrir fjölbreyttum og skemmtilegum skíðaáfangastöðum í nágrenni Reykjavíkur. Og ekki er verra ef svæðið geymir einhverja sögu sem hægt er að fræðast um.

Síðast en ekki síst viljum við í sameiningu skapa fallegan félagsskap fólks sem nærist á skemmtilegri samveru og útiveru og nýtur þess að leika sér úti við í öllum veðrum. Þetta er, og á alltaf að vera, BARA GAMAN 🙂

Dagskrá æfingahópsins

• Lau. 23. jan. Kl. 11. Fyrsta æfing
• Mið. 3. feb. Kl. 18
• Mið. 17. feb. Kl. 18
• Mið. 24. feb. Kl. 18
• Mið. 3. mar. Kl. 18
• Mið. 17. mar. Kl. 18

Fyrir utan fyrstu æfinguna sem er á laugardagsmorgni er stefnt að því að æfingarnar hefjist kl. 18 á miðvikudögum.

Athugið að færð og snjóalög setja oft strik í reikninginn svo að stundum þarf að snúa upp á dagsetningarnar. Ef snjóalög leyfa, þá er reynt að miða við að allar æfingarnar verði í nágrenni Reykjavíkur og að aldrei taki lengri tíma en um 40 mínútur að aka á upphafsstað göngunnar. Göngurnar sjálfar taka svo að meðaltali 1.5-2.5 klst.

Þátttakendur þurfa að eiga eða leigja ferðaskíði, þ.e. utanbrautarskíði með stálköntum. Hægt er að leigja skíði á nokkrum stöðum, m.a. hjá skíðaleigu Útilífs.

Þátttaka í æfingahópnum kostar 42 þúsund kr. Þau sem eru að taka Útinagla þrautirnar greiða aðeins 7 þúsund kr. Skráðir þátttakendur fá nánari upplýsingar í tölvupósti í aðdraganda námskeiðsins.

Ertu að byrja á ferðaskíðum?
Ef þú hefur lítið eða ekkert gengið á ferðaskíðum mælum við með því að byrja á byrjendanámskeiðinu Úti ferðaskíði, 14.–23. janúar. Þar lærirðu á skíðin, bindingarnar og skinnin og grunntæknina í beitingu skíðanna. Þetta byrjendanámskeiðið er sett upp þannig að þú getur síðan runnið beint inn í æfingahópinn, sem byrjar laugardaginn 23. janúar, sama dag og síðasta æfing byrjendanámskeiðsins.

Langar þig að ferðast lengra?
Ef hugurinn hneygist í þá átt að ferðast á gönguskíðunum með púlku í eftirdragi og læra allt um vetrarútilegur, þá er námskeiðið Ferðast á gönguskíðum fyrir þig. Það hefst með bóklegum fundi mánudaginn 18. janúar, búnaðarkvöldi fimmtudaginn 21. janúar og lýkur með vetrarútilegu helgina 30.–31. janúar.

Leiðbeinendur og fararstjórar eru Brynhildur Ólafsdóttir og Róbert Marshall, sem hafa menntað sig sem skíðakennarar og gengið á ferðaskíðum þvers og kruss, bæði á Íslandi og erlendis, eru með réttindi hjá Félagi íslenskra fjallaleiðsögumanna og gilt skírteini í WFR eða Fyrstu hjálp í óbyggðum.